得閒飲茶

近排天氣咁凍，番夜班簡直係活受罪，Tea break時飲番杯熱茶，暖入心！忙裡偷閒，得閒飲茶！

石屎森林

呢棵樹我成日响呢個角度影，春天夏天多樹葉好靚，秋冬天冇樹葉好淒清但係又有另一種feel

首張作品---全城禁煙

數碼單鏡機新丁，請多多指教！

數碼單鏡機新丁，請多多指教！
除咗玩車之外，我都鍾意影相，當然我最鐘意影車，以前出親街都袋住部Snapshot機，一見到D正車，得意嘅車就拔搶影低佢，其次就鍾意影風景，影人象我又冇乜興趣，可能我知道難度高啦，所以一直都係玩儍瓜機種，Olympus C-700, Fujifilm F401, Canon A80, Olympus X50, Panasonic FX-7, Fujifilm S602Z……etc。印象最深係S602Z，因為呢部係我唯一玩過嘅Prosumer級機種，我2年前從我大哥手中以低價收購咗佢，用咗2年都算勁抵！佢由1cm super macro對焦至6X光學Zoom，都可謂一鏡走天捱，加上Fujifilm Super CCD出名色彩豐富正正係我鐘意嘅，不過呢部機成象就比較差少少，而noise控制亦唔太理想，仲有夜盲症加上Super macro影象嚴重變形係呢部機嘅致命傷！上兩個禮拜，終於搵到好心人收購咗佢！
正當好多影相發燒友都爭論緊兩大牌子Canon定Nikon好之際，我就「退下一線」揀咗Pentax 中級機種----K100D，其實都算係入門機種，因為K100D係istDL嘅後繼機，但係istDL仲有貨尾响市面賣緊$3990kit，所以令K100D仲企响中級機種嘅位置！點解買Pentax？其實之前都係想買C記400D，因為身邊好多人都係買佢，但係自從用過FX7之後，我都覺得防手震係幾有用，加上K100D嘅成象都唔差過400D，而顏色我就鐘意K100D豐富少少，加上價錢平成截，$5300有kit鏡+2GBSD，真係好抵！初用1星期左右暫時仲係學習同適應緊，加上呢個星期天陰陰唔係影相時間，所以未敢下comment住，俾1個多月時間我去摸索吓先，只可以講同S602Z呢類Prosumer級機一比，單鏡機強勁好多！(咁比較好唔公平，哈哈！)
呢個Blog我會post 一D我嘅隨影出嚟，快門光圈嘅配合我一D都未掌握到，希望各位高手比D意見指教吓小弟，謝謝！